這年春天我在切爾諾貝爾－Augustine專訪

大家去旅行是為了甚麼？享受？購物？體驗當地文化？有沒有想過到一個受核電廠爆炸波及而變成死城的地方參觀？這次我們就請來了香港旅遊blogger Augustine分享一下他今年到烏克蘭切爾諾貝爾的感受，並向他請教一下旅遊攝影的心得。

Ｄ：Dennis
Ａ：Augustine

Ｄ：非常感謝你抽空接受我們的訪問，可以介紹一下自己嗎？

Ａ：普通人一個，冇咩特別，只係鍾意旅行，特別係歐洲同日本。

Ｄ：是甚麼原因令你想到切爾諾貝爾？

Ａ：去烏克蘭呢個概代念好多年前已有，初初無聊到只係覺得個名好型。後來在一些網站有初步了解，知道呢個國家雖然比較封閉，但有靚既建築，基輔既廣場同地鐵站可觀性亦高，加上讀書時有聽聞過切爾諾貝爾核事故，所以慢慢有左興趣。而我好多時去旅行都係會因為一d奇怪既想法而去的。例如第一次去歐洲係為左要了解細個睇既古希臘神話故事而要特登要去希臘、為左一張名信片好靚而計劃去克羅地亞等等。不過因為幾年前係香港拎烏克蘭簽證係好麻煩（需要去北京辦理，而且不一定成功）、所以一直唔成事，不過兩年前香港護照免簽證，開始計劃，終於係呢個復活節假成行）

Ｄ：要到切爾諾貝爾要做甚麼準備工作？有甚麼要特別注意？

Ａ：去切爾諾貝爾雖然有人聲稱係可以去到基輔先報名，但實際經驗係你最好先預訂，否則未必有位（因為有人數限制）。所以先要係網上一d認可網站報名，並用去匯錢／paypal交訂金，餘款到時付清便可。要注意的是去切爾諾貝爾一定要跟團（不接受個人遊），十八歲以上，預先提供護照資料以辦理通行證，出發時不可著短褲，拖鞋或涼鞋，牛仔褲亦盡量避免。亦要自備清水。

Ｄ：到切爾諾貝爾探訪之後，有沒有甚麼特別的感受想和大家分享？

Ａ：去切爾諾貝爾，最大感覺是：千祈唔好純觀光的心態去，否則你會好失望，因為若然你不熟該段歷史，去到只會覺得一片死寂，敗瓦頹垣（情況如去希臘或意大利龐貝古城睇古蹟一樣）。基輔巿有一座切爾諾貝爾博物館，建議出發前先去睇一睇，了解下件事的來龍去脈，咁去到現場時的感受會更深。

Ｄ：這次的旅程有沒有遇到一些趣事？

Ａ：今次我的行程是羅馬尼亞、保加利亞和烏克蘭，其實羅馬尼亞的感受更深，不過烏克蘭的話，可以講講既係當時正值前總理季莫申科係獄中投訴被毒打而引發示威。當時成個世界一致譴責政府，甚至揚言杯葛歐洲國家盃，但事實去到我見到既係其實亦有人覺得佢搬弄是非，唔值得支持，所以體會到唔好盡信一d所謂傳媒或者係公有價值觀。每件事，可以的話，自己判斷，自己求證。soft d 既可以講下基輔地鐵站全部起得好深，由月台上地面要搭五分鐘電梯，呢種感覺香港冇。

Ｄ：你的旅遊照片作品都很漂亮呢！可以和我們的讀者分享一些旅遊攝影小貼士？

Ａ：沒有特別貼士，不過自己由喜歡影相開始，初初會追求一d所謂好既器材，但慢慢會覺得冇呢個必要，反而構圖同耐性捕捉光線會更重要。而且出外旅行以輕便為主，應避免帶重的器材。這是烏克蘭旅行，便捨棄了單反而用了NEX-3. 要問問自己是希望去旅行然後拍照，還是因為要拍美的照片而去旅行。如果是前者而要追求好的器材，那是本末倒置，因為為了一些結果（拍照）而忽略了旅行，最後只會記得在甚麼樣的場合下拍了這張照片。那裡的感受，卻淺得可以。